سيوة واحة الغروب وأرض الأحلام

سيوة أرض الأحلام، واحة الغروب، وراحة البال ... سيوة أرض التراث والحكاوي من العصر الفرعوني وحتى العصر الحالي 😊

أين تقع سيوة؟

سيوة واحة مصرية موجودة في الصحرا الغربية و قريبة جدا من حدود ليبيا الشقيقة، وسيوة واحدة من مجموعة واحات مصرية معروفة من العصور المصرية القديمة وهي: (سيوة – الداخلة – الخارجة – الفرافرة – الفيوم)  

وعاوزكم تتخيلوا إن كلمة (واحات) أصلها مصري قديم وكانت بتتقال عند قدماء المصريين بنفس الطريقة بالظبط والجميل في الموضوع كمان إن كان فيه حاكم مصري مُعين من الملك المصري بيحكم الواحات وكان بيُطلق عليه (حكا واحات = حاكم الواحات)

تعالوا بقى نرجع لرحلتنا في أرض السحر والجمال والتأمل ... واحة سيوة 

أروح سيوة ازاي؟ 

أولاً: بالأتوبيس ... شركة غرب ووسط الدلتا ودا ممكن تركبه من ميدان عبدالمنعم رياض والأتوبيس تقريبا بياخد ١٠ ساعات من القاهرة لسيوة 

ثانيا: بالميكروباص ... ميكروباص مرسى مطروح من مشعل في الهرم ، ومن مرسى مطروح اركب ميكروباص لسيوة، القصة دي حوالي ٩ ساعات ...

أما بقى لهواة السفر بالعربيات الرحلة هتاخد معاك حوالي 7 أو 8 ساعات بس خلي بالك يا صاحبي أخر 300 كم من الطريق لا عليهم خدمات ولا فيه شبكات محمول يعني لازم تبقى مظبط حالك وبنزين عربيتك قبلها ... وربنا يستر طريقنا وطريقك 

ليه سيوة تحديداً

أكتر مكان سافرته في حياتي وحسيت فيه بالراحة النفسية والسلام النفسي وكله كوم وأهلها كوم تاني ... أنت بتتعامل مع أجمل وأجدع ناس في الدنيا، وفي أقل من ساعتين في سيوة هاتحس أنك عايش وسط أهلك وناسك ... على فكرة أهل سيوة بيتكلموا لغة خاصة بيهم (السيوية) ودي فرع من فروع الأمازيغية ودا لأنهم بينحدروا أصلا من قبائل البربر اللي منتشرين في دول شمال افريقيا كلها ... ودا طبعا مع اللغة العربية ... أما بقى لو أنت من محبي  التأمل   Meditation ... سيوة المكان الأجمل ع الإطلاق للتأمل والاسترخاء 

جزيرة فطناس - واحة سيوة - تصوير عزمي سلامة 

سيوة والسياحة الثفافية

-        جبل الموتى:  بنقوشها وألونها الجميلة اللي اكتشفها دكتور أحمد فخري رحمة الله عليه، وأهم مقابرها مقبرة سي آمون اللي فيها مزيج جميييل أوووي بين الفن والعقيدة المصرية القديمة والفن اليوناني.

-       وأنت في سيوة لازم تزور معبد وحي آمون  ودا أهم أثر في سيوة كلها ودا المعبد اللي قرر الإسكندر الأكبر يسافر مخصوص كل المسافة دي كلها علشان يسأل وحي أمون أبوه وعن مصيره ومصير امبراطوريته.

-       قلعة شالي: وهناك اسمع حكايات ممتعة أوي عن التاريخ السيوي القديم والحديث    -      

  

سيوة والسياحة الإستشفائية العلاجية

أما بقى أشهر حاجة في سيوة هي السياحة العلاجية اللي الناس بتجيها مخصوص من كل مكان مصريين وغير مصريين ودا بيكون في جبل الدكرور ودا لعلاج الروماتيزم والروماتويد وآلام المفاصل أه والله زي مابقولك كدا بالظبط واوعى كمان تفوت عيون المياة الكبريتية.

عين كليوباترا - تصوير عزمي سلامة

وأنت في سيوة أنصحك بلاش تفوت رحلة السفاري في الصحرا والله بقى لو قضيت ليلة هناك في كامب ... وماتنساش بقى وأنت بتاكل "أبورديم" تبقى تدعيلي 

من الحاجات اللي ماتتفوتش في سيوة بحيرات الملح وكمان ماتنساش تزور عيون المياة وأهمهم عين كليوباترا (على فكرة العين ليس لها أي علاقة بالملكة كليوباترا على الإطلاق)، عين واحد ونصيحة أخ بقى أوعااااااك تفوت الغروب في جزيرة فطناس وطغاغين 

 

  

معبد وحي أمون في سيوة 

يلا جهز/ي شنطتك وحالك ولم شلتك ويلا بينا على سيوة

عزمي سلامة